老墨餐 - Guacamole + Nacho (含食譜)

老墨 --- 墨西哥是也～～

牛油果雖然熱量好高，但係好鬼好食
向好嗰方面諗，佢可以降膽固醇既！

牛油果作為墨西哥既土產，當然會喺好多墨西菜度出現

今日整既牛油果醬加Nacho更加係墨西哥當中最出名既名菜之一！

開PARTY既時候最啱食！

牛油果醬既材料:

牛油果 x4
牛茄x1
芫茜 一大紮
紅洋蔥
辣椒

青檸

Nachos

現成既tortilla chips
Mature cheddar
蕃茄 x 2
芝士

造法︰

將Guacamole 既材料全部切碎 

蕃茄切碎後,  我會先用廚房紙印乾先 

辣椒: 如果怕辣可以落少D, 唔好落入面既子. 

洋蔥︰如果買到我都會用紅洋蔥, 因為無咁辣。

但係如果買唔到, 或者屋企有普通洋蔥都無問題, 落既份量就唔好咁多。

牛油果方面, 將牛油果起肉, 

肉叉壓成牛油果蓉 

如果你鐘意CHUNKY D 既, 就唔洗壓到咁爛, 食既時候口感會好D. 

以下係四個牛油果壓出黎既牛油果蓉, 睇落唔係好多, 但係加埋其他材料, 就會好多家勒~

所有材料都準備好, 就可以將材料逐一加入牛油果蓉入面. 

究竟加幾多呢, 就視乎你喜好而定

我習慣以下次序去落材料

蕃茄 --> 芫茜 --> 洋蔥 -->辣椒 --> 青檸 -->鹽 + 黑胡椒 

蕃茄, 我今次放左一個牛茄多少少既份量

如果你鐘意CHUNKY D 既, 可以加多少少蕃茄都唔怕. 蕃茄味道唔太濃, 唔怕落得多, 不過最怕佢出水, 所以之前最好印乾D. 

芫茜, 洋蔥, 辣椒 呢D 就最逐少逐少落, 一定要試味. 試左覺得邊樣唔夠先再加. 

因為加多左, 就無得番轉頭... 而且好似乎你對呢D 咁重口味既材料既喜好, 所以我都無特別寫各種材料既份量 

我今次用左芫茜 (5-6棵, 其實唔夠, 應該要多少少); 紅洋蔥半個; 辣椒5隻, 連埋籽落(如果怕辣就千其唔好呀)

青檸榨汁直接撈入去, 一定要試味啦. 我試過懶唔去買青檸, 而改用檸檬... 

係唔得家, 檸檬同青檸雖然大家都係酸. 檸檬係取代唔到青檸嗰種SHARPNESS, 所以一定要買到青檸.

青檸除左調味之後, 仲可以防止牛油果氧化變色. 有D 人話將牛油果大大粒嗰粒籽放埋入去就可以防止氧化... 可以一試既... 我試過就覺得無乜分別. 

最後再加鹽同胡椒調調味. 

撈勻就食得.

又簡單又好食

NACHO 方面, 仲簡單. 

預熱焗爐200度左右

將TORTILLA CHIP/ NACHO CHIP 放入面一個焗得既盤/碟上面

薄薄地鋪一層CHIPS, 再灑一層車打芝士, 蕃茄, 洋蔥. (如果有牛油果多, 牛油果可以切細粒灑上戈去都得) 

之後再鋪一層CHIPS 同埋其他配料 

直至所有野用哂為止

芝士最好留多少少鋪面 

焗爐預熱後, 就可以放入焗爐度焗10 - 15分鐘, 直至芝士溶哂為止！

超簡單, 又好食！

如果食唔哂, 可以放入雪櫃KEEP 1-2日既. 不過個面一定會有D變色, 唔怕既. 唔鐘意可以刮走去.

牛油果醬除左同NACHO 一齊食之後, 其實仲有好多用法

可以放入三文治度啦, 

可以放喺TOAST 上面, 好似BRUCHETTA 咁食 

點NACHO之後，其他餅乾都可以點黎食。　

每次整多少少都唔怕！