Cafe Deadend : secret gem at Po Hing Fong

Cafe Deadend
地址︰上環普慶坊72號地下
電話︰6716 7005
 推薦: ★★★★★

以上圖片來自cafe deadend 官網... 

颱風下的一個下晝, 趁住停雨後的短暫陽光, 趕快黎到普慶坊既Cafe Deadend. 

知道呢間cafe size 唔大, 但係俾我想像中多位. 估唔到, 星期四下著雨既中午, cafe 全院滿座. 幸好一個人容易"攝". 

不過如果天氣好, 其實佢有outdoor 既dinning table, 不過要help yourself. 都係d license 既問題啫. 

望一望menu, 就揀左以下呢個B(acon).E(gg).L(ettuce).T(omato). ($95) 同埋一杯LATTE ($34)

同平時既BLT 多左SUNNY SIDE UP 既雞蛋. 

賣張好靚喎. 嗰隻SUNNY SIDE UP 既雞蛋 令到個DISH 賣相好吸引.
呢個BURGER, 如果用手好似食老麥咁食, 一定出事.
好彩跟左我主子幾年, 己經學會用刀叉食BURGER 既絕技.
一手拎起左面嗰塊bun, 一刀一刀咁切下去.

B.E.L.T 入面有好多Bacon, 脆卜卜, 又唔油, 好有咸香.
Lettuce 同 Tomato 入面有balsamic vinegar, 非常之好味

食到一半.... 點可以冷落左面嗰塊bun...

MENU入面寫明個麵包係用法國牛油 A.O.P 麵包. 之前一直連埋d 含一齊食底嗰塊,
完全遮蓋哂麵包既味道. 當我咬下第一啖淨 麵面, 嘩.. ! 好食到呀

塊面包好新鮮,  咬左一啖, 被咬扁既麵包自動回彈, 非常之鬆軟

呢個面包, 我可以淨係食麵包,唔洗加任何野, 淨係食麵包食飽.

我唔知應該咩comment ...
應該話B.E.L.T 喧賓奪主 搶哂麵包既味道.. ??
定應該話呢塊咁正既麵包喧賓奪主搶哂B.E.L.T 既風頭..??

個麵包真係好好味.
同職員傾左陣, 原來cafe 隔離嗰間麵包店Po's Atelier 就係佢地既姊姊店. cafe 用既所有麵包都係佢地供應, 唔怪之後咁出色啦.

難怪我個鬼佬主子呢排都不禁感慨, 十幾年前黎香港, 最思鄉既原因係香港無出色既麵包, 出色既啤酒, 出色既香腸, 等左十幾年, 香港而家終於三樣都有齊.

最後就係呢杯latte, latte art 有d 失望.. 其實係咪要開口要求先會有d 靚既latte art ?? 次次我都係得到呢d 款既... 

Chorizo Pasta @home

忙碌既一日，上班途中又俾人whatsapp問..

佢：”你今晚想出街食定喺屋企食？”
我：我唔想出街食，又唔想煮。
佢：..... 

(我聽完自已咁講，都鄧佢可憐，俾我自已都唔知點答自已好)

我：等我諗下........

懶人要懶.... 有何難。Pasta is my friend~~ chorizo is our guest~ 

了哂櫃底存貨

一罐tomato pasta sauce
200g 螺絲粉
最緊要係我地今晚既主角chorizo
番屋企半路買埋鮮白磨菇
咁就事成

早前喺Porterhouse訂禮物，為左買夠$500免速遞費，又要迫我網上shopping...（其實不知幾開心） 就係買左呢包chorizo ($70/100g).

先將chorizo煎香，出咁d油
倒走d油後再加白磨菇輕炒，再加蕃茄意粉醬。 同時煮埋意粉，懶人餐就事成

。

喺香港要買好食既chorizo真係好難.
Porterhouse先款都尚算唔錯。唔太咸，不過唔spicy.

為左spice up一下呢個懶人餐.
又有絕招......

以前我會落Tabasco

...
自從喺曼谷big C偷聽左一個香港C9話呢隻名叫"地獄辣醬"乾辣椒粉好用之後，如獲至寶.

呎隻乾辣椒粉比Tabasco好既地方，就係佢得個辣字，無其他味. 

Tabasco有佢嗰種Tabasco味，一食就知落左tabasco. 但係呢隻辣椒粉就唔會， 佢好稱職咁純粹令個dish 加辣，而佢無另外一種味去搶個dish既味道. 

平時食湯麵，都可以放入去加辣，放多放少你自已決定ru.

一個懶人餐又過關。

”佢”又食得開心喎。

Birthday Dinner @Peninsula the lobby

七月半島酒店做promotion,七月份生日既朋友仔，喺lobby享用晚餐set dinner（$345+10%），買4送1， 仲會另外送一個黑森林蛋糕！

2個月前見到介紹，即刻打去訂枱，差d連訂左邊日幾點都唔記得。

是日menu, 3course menu,都係有魚有肉有菜，各取所需。

1st course-香蔥忌廉湯（Mushroom soup, chives)

嘩.第一啖入口，cream到無朋友。最啱我呢d唔怕肥既死士！怕cream既朋友真係要三思. Mushroom味好濃郁，仲要啖啖mushroom,正！
咁creamy既野，最大潛在問題就係會太滯。當晚既份量預得啱啱好！激讚！

2nd Course燒牛柳，焗馬玲薯，時蔇 (Roasted beef tenderloin, condiment, seasonal vegetable)

Ordere左medium rare, 件tenderloin都燒得啱啱好，好 juicy. 焗薯一d都無配料，staff只offer soul cream..... 如果可以有芝士就perfect...

3nd course 香脆泡芙， 紅桑子，呍喱拿雪糕（chripsy chorux, raspberry, vanilla icecream)賣相一流！三款甜品中最靚仔既一款. 味道又唔太甜，啱啱好。脆方好脆卜卜，正！

最後就係附送既黑森林蛋糕。果然無白費我幾飽都要食既苦心！細個食黑森林蛋糕，第一樣野就拎走面頭嗰粒超濃藥水味既cherry. 半島呢件蛋糕係唔需要咁做，因為d cherry係藏喺蛋糕既底部，而且唔係藥水味，而係剛剛taste到既酒味，真係好好食。外面好多好高質素既pastissarie, 好多好高質素，好花巧好精緻既蛋糕，突然食番一個超水準”那些年”既黑森林蛋糕，感覺似重回基本步一樣。 

Ratatouille @ home

今日原本諗住簡簡單單煎牛扒作晚餐, 番屋企途中諗緊配咩菜時候, 突然諗起又健康又易整既Ratatouille!

Ratatouille 係一道經典既法國素菜, 千其唔好俾法國菜呢個名嚇親, 非常之易整, 酸酸甜甜, 好開胃

材料︰
洋蔥 x 1(切細粒)
番茄 4 個 (去皮) / 罐裝番茄 x 1 (原粒既就切細)
茄子x1 ( 切去頭尾, 切片)
翠玉瓜x1( 切去頭尾, 切片)
紅椒、黃椒 各一 (去籽, 切粒)
蒜頭 x 3 瓣
basil 一束 (只要葉, 用手"搣"細塊)
紅酒醋(red wine vinegar) 1湯匙
糖 1茶匙

需然材料比較多, 但係準備方法都係好隨意, 材料好chunky 就可以, 唔洗好fine 咁切碎

煮法:
預熱隻pan後, 轉中火, 每次加少少油 , 分別炒以下三樣材料,( 中間唔洗洗pan 家)
1)茄子炒大約幾分鐘, 至淋身, 備用
2)翠玉瓜炒幾分鐘, 表面金黃色, 備用
3)紅、黃椒輕炒, 不需要太熟 備用.

-落少少油, 將洋蔥炒至透明, 略啡, 加蒜頭再炒多一分鐘至聞到蒜香
-將紅酒醋及糖
-將蕃茄連同一半basil倒入pan 內煮
-將之前炒過的三種材料回獲煮滾, 加鹽及胡椒調味
-上枱前將剩下的basil 放面

Moules mariniere 白酒煮青口@home

好耐無煮野食, 今日的起心奸下煮. 作為一個warm up dinner, 當然煮個又易又好食既菜式

Moules mariniere 即係白酒煮青口

city super 或一d 大少少既超級市場都會有得賣法國, 紐西蘭或澳洲既青口. 真空包裝, 入面既青口仲係活生生既. 法國比較細小, 紐西蘭或澳洲就好大隻, 好似蠔咁大隻. 

今日我喺city super 買既就係紐西蘭既青口 ($148/kg) . 因為好大隻, 所以2kg 都只有29隻 

2 個人夠食有餘, 加埋麵包點汁食就perfect. 

青口買番黎只要真空無漏氣, 都可以放喺雪櫃幾日先整都無問題

當要食既時候先拎出黎. 

準備:

1)將青口放入一盤凍水入面, 

2)用小刀仔 將表面痴住既貝殼, 石頭 等等 刮走

3)青口邊會有少少好似海草咁既野, 只要用少少力扯佢出黎就可以. 

4)再用百潔布清擦一下外面

5) 再用新一盤凍水過過水 

6)其中, 如果見到一d 青口個殼爛就揀走佢, 因為隻青口好大機會己經死左

7) 如果有開口既, 就輕力嗃下個殼, 如果活生生既青口, 就慢慢將殼緊閉. 

好似好麻煩咁, 放心. 個dinner 己經完成左8成

8) 將洋蔥切細粒, parsley 切碎

9) 預熱一個夠大既煲.. 

10) 放少少油, 將洋蔥炒至透明, 但唔要啡 

11) 先將青口放入煲內, 轉大火

12)再放大約200ml 既白酒 

13) 立即蓋上煲蓋, 計時, 大約蒸 3-4

14)中間每一分鐘要大力拎起個煲搖, 令到各青口都均勻受熱, 接觸到蒸氣

15)大約4分鐘就可以上枱. 上枱前將parsley 灑入煲內

Tips

揀煲既方法: 

A)放哂青口入去, 最好唔過個煲既一半

B)要用一個夠密實既煲, 如果漏氣就會事倍功半, 蒸極都蒸唔熟. 

白酒要用比較dry 既, 唔好太甜. 

不用加任何調味, 青口既鮮味夠哂味. 

如果煮完發現有青口唔開, 都唔等於唔食得, 只要能輕易揭開個殼都可以進食

而且壞/ 臭/ 未煮己死去的青口, 嗰陣腥臭味, 你一咬就分得出. 

Yorkshire Pudding

地址︰中環蘇豪士丹頓街6-8號

推薦度: ★★★★☆

明明喺PMQ night market食飽左

黎到YORKSHIRE PUDDING 都係忍唔住叫左黎食

Yorkshire pudding + Gravy 

試業的Craft Brew & Co. HK

地址: 中環奧卑利街17口號 

推薦: ★★★☆☆

Craft Brew & Co 既圍板圍左大半年有多, 一直都諗由一間gallery 轉化為一間bar 要咁多時間咩.

上星期聽聞終於開左, 於是去睇下, 點知摸門釘。前幾日試業終於入左去ru

炎炎夏日, 竟然將玻璃門大開... 因為冷氣壞壞地. 職員見我咁大汗, 建議我地坐喺bar 枱

同一般酒吧唔同, 呢度既beer on tap 個tap 喺install 喺牆度, 個idea 超形, tap 面無任何啤酒local.
一行十五個tap handle 喺白色既牆上面, 如果職員記得邊隻打邊隻, 真係超型呀.

唔知係咪由於試業既關係, 職員連自已有咩啤酒都唔係太清楚.
雖然有15個tap, 但係只有一半係有供應.
喺白色牆上面有貓紙, 用label 寫住啤酒名. 希望間bar run 行左, 職員可以做到完全無貓紙

一坐低, half chinese half aussie 既老細就解釋酒吧今日有咩酒供應, 身邊嗰個呢排鑽研IPA, 於是只點IPA. 點知有2款IPA 只係得HALF PINT 價錢 $48. 於是多口問老細點解只標HALF PINT, 老細竟然話因為嗰2隻啤酒比較濃, 其實都係講緊6.幾%, 比起一D 比利時啤酒, 6點幾可以係最弱既啤酒. 於是佢講笑咁答, 咁我要2 杯啦. 於是黎左一FULL PINT, 開始諗究竟佢會收我地$96 定係另外有1 PINT 既價錢？

結果收左$75, 即係同其他最貴既啤酒價錢一樣.

呢幾年開始有CARFT BEER 熱潮, BEER DRINKER 開始俾寵壞. 好似呢間有15 TAP BEER 既BAR, 身邊嗰個都投訴15種啤酒, 大部份都可以喺其他吧度搵到, 而且與佢想像中唔同既係, 佢以為呢度會有自已既HOME BREW, 令佢大為失望, 寵壞了的酒鬼.

價錢方面同佢既至愛ROUND HOUSE 差唔多, $65 - $75 一PINT.

除左TAP BEER 之外, 佢仲有好多CRAFT BOTTLE BEER, 大約有20支, 比起HK BREW HOUSE 旗下既酒吧又失色左少少.

職員對啤酒既知識都唔係太高, 首先ORDER 啤酒要指牌先聽得明, 有職員仲答錯其他客人既問題, 聲稱 FRUIT BEER 係CIDER. 嗰隻FRUIT BEER 係用士多啤梨釀既, CIDER 只可以蘋果或者啤梨釀先可以叫CIDER. 呢樣野真係要多多改善

食物方面, 當日係無食物供應既, 但聽聞, 佢地係會有HOME MADE SAUSAGE.
亦都見到有煮食爐, 唯有等佢正式開業先知食物水準如何