西班牙辣肉腸紅酒汁意粉 Chorizo Pasta with Red Wine Sauce

屋企唔知點解, 總係有包Chorizo... 無計仔, 人地鐘意食。

因為懶既關係，諗起chorizo pasta 就會好似上次咁用現成既蕃茄醬加pasta 煮黎食。
成日咁食都唔係辨法... 於是的起心肝上網搵下.

喺BBC  搵到呢個紅酒汁食譜, 都幾得意喎, 從來都無諗過可以用紅酒煮意粉
仲要好簡單, 包你唔洗30分鐘食得。

材料: (三人份)
紅洋蔥 半個
辣椒仔 2條 (隨你鐘意加減)
chorizo 200g
蕃茄仔 100g
茄膏50g
紅酒300ml
蒜頭 4辦
300g  意粉

1) 燒熱煎pan, 加2tbsp olive oil , 同一時間煲一大煲水, 跟packing指示煮意粉
2) 將紅洋蔥同辣椒仔 炒香, 大約2分鐘
3) 將chorizo 落獲一齊炒5分鐘 或者至表面金黃
4) 將其餘材料放入去一齊煮, 煮至個汁滾起, 較慢火慢慢收水, 大約15分鐘
5) 加salt & peppre 試味
6) 意粉煮好之後, 隔水
7) 將意粉倒落紅酒汁入面兜勻就食得

Tips:
1)意粉 最好揀短身既, 好似 penne / spiral , 因為易d 兜勻呀
2)我另外再加左我既最愛黑檻欖, 為左唔會令到佢太淋, 我就喺放意粉落個汁之前先加入去煮一陣.
3) 如果個汁太稀, 可以稍稍放多少少茄膏, 再煮耐少少.

Butchers Club Burger

地址︰灣仔蘭度街2號麗都大廈10號地鋪
電話︰25282083
website: http://www.butchersclub.com.hk/burgers/story.shtml
推薦度︰ ★★★☆☆

星期五 Happy Friday 晚上，喺PP3飲完野， 十點先行去附近既Butchers Club Burger食burger.

當我地去到廚房剛剛準備收檔，好在chef take埋我地既order.

Butchers Club burger 當然係黃竹坑Butcher's Club 既新作，多個weekend喺黃竹坑serve burger 小試牛刀後，終於喺灣仔展開新既一頁，開一間地鋪。

地鋪喺灣仔蘭度街既一個角落店，小店內只有約十幾個座位，open kitchen加強左小店既空間感，加上靈活運用一邊大窗，大窗兩側都有high table，增加左唔少座位。

店內menu得三項食物 (之後先知原來佢地有secret menu) 

1) Burger $100

2) Duck Fat Fries $20

3) Softdrinks $20

運作模式都好簡單，喺counter order野食，staff會俾張單你。單上有你既order number。當食物準備好後，staff會大叫你既order number, 只要向職員示意，職員就會將食物奉上。

好快，我地叫既2個burger同Duck fat fries就有得食。

Burger size同上次喺黃竹坑既一樣。新鮮做好既burger一咬落去，juicy既patties漏哂汁，牛肉味好濃，好好食。今次patter有d burnt，有少少食到苦味， 但係patties既質數不用置疑。

Duck fat fries size唔大，始終都係$20，size都算唔錯。用新鮮薯仔炸既，名話用duck fat炸，又唔覺得特別香口。我最鐘意既薯條始終都係soho Iberico既 fries with truffles salt.

Burger同上次喺黃竹坑既一樣好食. 問題在於價錢。上次係半價，即係$50一個。今次相同既食物，要用$100先食到。當然我唔能夠expect開新店都用番$50呢個promotional price. $100食呢個burger，又好似唔係好抵。

唔抵既原因唔在於佢唔好食/質素唔好，而在於有比較。beef &liberty一個burger無煙肉既只係$98。size比呢個大，個bun比呢個做得好, 而且B&L 係一間decent restuarant. Brutcher 's club deli走既路線係quick meal/takeaway 快餐style. $100一個burger我覺得有d唔抵。作為一個女子，我食完呢個burger其實都唔係十分飽，加$20 要埋個fries, 再加$20 要個汔水，總共$140。我更加會選擇B&L. Burger 既選擇仲更加多。

如果我要個burger quick meal, 我又可能會揀PP great supermarket 既triple O. 質素無咁好，但係價錢平一半，份量又較大，坐得仲舒服d添。

最意外係個beer selection, 得最平最平同藍妹無乜分別既啤酒。連我個酒鬼主子見到都唔飲.... 

啱啱先知道如果Butchers Club Burger 上網有secret menu !! 

喺店入面係唔會見到, 只有佢地個website 先搵到. 

http://www.butchersclub.com.hk/burgers/secret_menu.shtml 

Peace'O'Cake︰百日宴蛋糕

Peace'O'Cake 

Facebook shop: https://www.facebook.com/Peace.O.Cake.Cakes?fref=photo

電話︰9745 2645 

電郵︰peaceocake11@gmail.com

推薦度︰★★★★☆

朋友寶貝仔百日宴，要搵freelance 整蛋糕，就諗起朋友介紹過我既Peace'O'Cake 

Peace'O'Cake 既主持人part time 造蛋糕, 佢正職係空姐黎既. 帶黎一個問題, 就係搵佢訂造蛋糕要同佢夾佢既飛行更期。好在今次佢都可以抽到時間幫我朋友做呢個靚靚蛋糕。不過佢都好flexible, 都會盡量同客人夾時間。

百日宴既主題係芝麻街，咁啱佢之前都做過芝麻街既蛋糕, 時間又夾到, 一切都一拍即合。

約略傾下細節, 蛋糕喺百日宴其實都係拎黎影相多過食, 原本佢之前做既係5磅 ($1700) , 我地都預左d 人唔會有胃口食到蛋糕, 都好坦白咁同佢講, 3磅($1200) 都夠. 唔洗落訂, 大家講一個信字, 咁就訂左勒。

初頭都有d 擔心3磅會太細, 朋友咁信得過我, 由我負責幫佢訂蛋糕，我都唔想令佢失望, 同埋都想個蛋糕有睇頭, 唔會太細太小家。

嗰日下晝, 佢send 張相俾我, 我都有d 意外, 3磅咁大家原來! 心諗好在無訂5磅啫。到夜晚見到真野，更加喜出望外。親戚朋友都好開心咁同個蛋糕影相。

樣就好勒, 味道如何呢?? 

個糖皮當然唔好食啦。話好食都無人會信。

訂蛋糕嗰時, 主持人問過我想要咩味。我始終都係對檸檬蛋糕情有獨鐘，朋友又無意見，於是又決定左做我最鐘意食既檸檬蛋糕。

Peace'O'Cake 既主持人係外國空姐，佢做既蛋糕都係比較西化。香港人我地都比較鐘意海綿蛋糕，軟綿綿。如果你都係鐘意軟綿綿蛋糕既話, 搵Peace'O'Cake 之前就要三思勒，因為佢西式既蛋糕係好實淨，好solid 既. 呢個蛋糕都係一樣，好似傳統carrot cake 咁樣, 好重身。食緊蛋糕既時候都聽到好多人食左一啖就話"嘩" 個蛋糕咁實既? 個蛋糕係好solid, 但係佢其實做得好好，因為佢好moist 家, 唔係因為over cook 而又乾又硬嗰種實，係moist 同solid。

事後, 我都contact 番主持人，多謝佢做個咁好既蛋糕俾我地。都大讚個蛋糕比我想像中既三磅大。佢都笑笑口話其實佢喺sizing嗰時都好隨心，所以成日都做到個蛋糕太大。佢話嗰個蛋糕其實都有5-6磅！超抵！

GABA concept cafe: soft opening

地址︰1/F, Diamond Mansion, 462-468 Lockhart Road, Causeway Bay, Hong Kong

電話︰3679 0348

推薦度︰★★★★☆

朋友籌備已久既cafe於開張，soft opening既第一日已經急不及待去撐場。

Soft opening第一日，食物款式唔多，下晝有chicken pie($35) 同 quiche($35) 小試牛刀。我揀左chicken pie 加$20 要latte.

Cafe除左一般latte, flat white, piccolo , expresso等等供應之外，仲有唔同既即磨咖啡豆，及hand drip coffee (食物order + $30). 我order既latte黎到，對個latte art有少少失望啦......  又係呢個例牌行貨......

等左一陣chicken pie黎勒。
Food presentation好靚呀。

個chicken pie個pastry可以見到係handmade,唔係用冷藏既pastry. 唔乾，好脆，好好食。

最正係個pie含。第一啖咬落去就食到陣陣既檸檬味，mozzarella cheese好creamy, 因為有檸檬味既陪襯，一d都唔覺得好飽飽滯滯。鷄肉唔係太多，但係都足夠。
整體黎講，真係好好味。

遲d 正式營業一定再黎食過

燒鳥亭

燒鳥亭

地址︰跑馬地成和道49 - 51號地下C
電話︰2838 5377
推薦度: ★★★★☆

銅鑼灣呢個超級旺區，喺正側邊有2個較low profile既大坑同跑馬地相連. 大坑潮爆，跑馬地相對地比較established。喺跑馬地同大坑住，餐廳既數量當然無soho嗰多，量雖少，但精。足不出戶喺區內就可以access到好好既餐廳. 跑馬地 燒鳥亭就係區內的名店。

燒鳥亭係一間日式串燒餐廳，小店可以分前後區。前區係開放式串燒廚房及用餐位置，後區係後欄準備區加一個VIP 房（max20人)，無event就俾客人用餐。

Menu上既選擇都幾足夠，串燒menu之外，仲有小食及熟食menu。一般我地2個人黎食，大約叫5-6 個串燒就夠。我記得初初搬到跑馬地無耐，當日剛好係我地結婚前一年，諗住去一間好d既餐廳食下野，嗰次就係我地第一次黎燒鳥亭食野。到今時今日，結婚就快2年，我地叫既野食同嗰次食既野差唔多。因為實在太好食勒... 每次都唔捨得唔食食開嗰d...

以下就係我地經常食既串燒：

燒鷄翼：
我覺得香港人食野有2個盲點：鷄翼 同 魚蛋。食一世都唔會厭。呢度既鷄翼，司傅好細心咁將鷄翼2條骨拆開，客人食後方便，司傅又燒得容易。

汁燒牛肉（$28）：
今次司傅失手左少少，串牛肉燒得比較韌。好在個燒汁無走樣，好好味.
牛肉都可以揀鹽燒，我地之前食過，老實講，因為牛肉質素普通，汁燒相對就cover左少少牛肉既短處。

Menu上仲有另一款安格斯牛肉（$52），價錢比普通牛肉差唔多貴一個double, 牛肉係好食d, 個廿差價我寧願俾多少少，叫多樣，hee hee.

燒銀雪︰
呢款簡直係我地既至愛, 每次食完一串, 都再想食多串.
魚皮燒得又脆又唔油膩, 次次都完整無缺。
銀雪魚入口即刻解體. 非常非常之好食, 一貫高水準! 必食串燒!



































露荀豬肉卷︰
另一款非常之好味既串燒, 露筍又爽, 包住露筍既豬肉, 咬落去有陣陣既豬肉味, 燒得啱啱金黃, 香口. 正！


























燒飯團︰
作為大飯筒既我, 點可以唔食飯.
飯團有好多含可以揀: 三文魚、縵魚, 鏗魚碎, 三艾魚子, 梅。
我地揀左三文魚.
飯團表面又脆, 又香口, 好似食煲你飯煲焦一樣.
入面既飯又唔會燒過度而乾涸.
要有飯到肚既朋友, 呢個正！

燒日本青椒仔︰
呢個係日本串燒既名物, 唔食唔自在.
選用日本新鮮青椒仔，唔會令你件望。


燒日本甜薯︰
日本番薯又甜, 又有味. 呢個串燒, 更加有陣陣既燒烤味, 及芝麻既香味。

唯一有少少不滿, 就係次次都係最後先到, 有時貪心, 叫得太多, 黎到最尾先食燒番薯, 實在對個番薯太唔公平。

其實仲有好多其他既串燒喺menu 可以選擇, 但係我地偏偏就不斷咁order 呢幾款, 款款都咁好食, 你話點捨得改叫第二樣？

店內仲有燒鵝肝, 一直都好想好想試.

但係店內每款串燒都要order2串起, 我主子唔食鵝肝呀......

可惜... 希望有一日我可以試到！

Cafe Deadend : secret gem at Po Hing Fong

Cafe Deadend
地址︰上環普慶坊72號地下
電話︰6716 7005
 推薦: ★★★★★

以上圖片來自cafe deadend 官網... 

颱風下的一個下晝, 趁住停雨後的短暫陽光, 趕快黎到普慶坊既Cafe Deadend. 

知道呢間cafe size 唔大, 但係俾我想像中多位. 估唔到, 星期四下著雨既中午, cafe 全院滿座. 幸好一個人容易"攝". 

不過如果天氣好, 其實佢有outdoor 既dinning table, 不過要help yourself. 都係d license 既問題啫. 

望一望menu, 就揀左以下呢個B(acon).E(gg).L(ettuce).T(omato). ($95) 同埋一杯LATTE ($34)

同平時既BLT 多左SUNNY SIDE UP 既雞蛋. 

賣張好靚喎. 嗰隻SUNNY SIDE UP 既雞蛋 令到個DISH 賣相好吸引.
呢個BURGER, 如果用手好似食老麥咁食, 一定出事.
好彩跟左我主子幾年, 己經學會用刀叉食BURGER 既絕技.
一手拎起左面嗰塊bun, 一刀一刀咁切下去.

B.E.L.T 入面有好多Bacon, 脆卜卜, 又唔油, 好有咸香.
Lettuce 同 Tomato 入面有balsamic vinegar, 非常之好味

食到一半.... 點可以冷落左面嗰塊bun...

MENU入面寫明個麵包係用法國牛油 A.O.P 麵包. 之前一直連埋d 含一齊食底嗰塊,
完全遮蓋哂麵包既味道. 當我咬下第一啖淨 麵面, 嘩.. ! 好食到呀

塊面包好新鮮,  咬左一啖, 被咬扁既麵包自動回彈, 非常之鬆軟

呢個面包, 我可以淨係食麵包,唔洗加任何野, 淨係食麵包食飽.

我唔知應該咩comment ...
應該話B.E.L.T 喧賓奪主 搶哂麵包既味道.. ??
定應該話呢塊咁正既麵包喧賓奪主搶哂B.E.L.T 既風頭..??

個麵包真係好好味.
同職員傾左陣, 原來cafe 隔離嗰間麵包店Po's Atelier 就係佢地既姊姊店. cafe 用既所有麵包都係佢地供應, 唔怪之後咁出色啦.

難怪我個鬼佬主子呢排都不禁感慨, 十幾年前黎香港, 最思鄉既原因係香港無出色既麵包, 出色既啤酒, 出色既香腸, 等左十幾年, 香港而家終於三樣都有齊.

最後就係呢杯latte, latte art 有d 失望.. 其實係咪要開口要求先會有d 靚既latte art ?? 次次我都係得到呢d 款既... 

Chorizo Pasta @home

忙碌既一日，上班途中又俾人whatsapp問..

佢：”你今晚想出街食定喺屋企食？”
我：我唔想出街食，又唔想煮。
佢：..... 

(我聽完自已咁講，都鄧佢可憐，俾我自已都唔知點答自已好)

我：等我諗下........

懶人要懶.... 有何難。Pasta is my friend~~ chorizo is our guest~ 

了哂櫃底存貨

一罐tomato pasta sauce
200g 螺絲粉
最緊要係我地今晚既主角chorizo
番屋企半路買埋鮮白磨菇
咁就事成

早前喺Porterhouse訂禮物，為左買夠$500免速遞費，又要迫我網上shopping...（其實不知幾開心） 就係買左呢包chorizo ($70/100g).

先將chorizo煎香，出咁d油
倒走d油後再加白磨菇輕炒，再加蕃茄意粉醬。 同時煮埋意粉，懶人餐就事成

。

喺香港要買好食既chorizo真係好難.
Porterhouse先款都尚算唔錯。唔太咸，不過唔spicy.

為左spice up一下呢個懶人餐.
又有絕招......

以前我會落Tabasco

...
自從喺曼谷big C偷聽左一個香港C9話呢隻名叫"地獄辣醬"乾辣椒粉好用之後，如獲至寶.

呎隻乾辣椒粉比Tabasco好既地方，就係佢得個辣字，無其他味. 

Tabasco有佢嗰種Tabasco味，一食就知落左tabasco. 但係呢隻辣椒粉就唔會， 佢好稱職咁純粹令個dish 加辣，而佢無另外一種味去搶個dish既味道. 

平時食湯麵，都可以放入去加辣，放多放少你自已決定ru.

一個懶人餐又過關。

”佢”又食得開心喎。

Birthday Dinner @Peninsula the lobby

七月半島酒店做promotion,七月份生日既朋友仔，喺lobby享用晚餐set dinner（$345+10%），買4送1， 仲會另外送一個黑森林蛋糕！

2個月前見到介紹，即刻打去訂枱，差d連訂左邊日幾點都唔記得。

是日menu, 3course menu,都係有魚有肉有菜，各取所需。

1st course-香蔥忌廉湯（Mushroom soup, chives)

嘩.第一啖入口，cream到無朋友。最啱我呢d唔怕肥既死士！怕cream既朋友真係要三思. Mushroom味好濃郁，仲要啖啖mushroom,正！
咁creamy既野，最大潛在問題就係會太滯。當晚既份量預得啱啱好！激讚！

2nd Course燒牛柳，焗馬玲薯，時蔇 (Roasted beef tenderloin, condiment, seasonal vegetable)

Ordere左medium rare, 件tenderloin都燒得啱啱好，好 juicy. 焗薯一d都無配料，staff只offer soul cream..... 如果可以有芝士就perfect...

3nd course 香脆泡芙， 紅桑子，呍喱拿雪糕（chripsy chorux, raspberry, vanilla icecream)賣相一流！三款甜品中最靚仔既一款. 味道又唔太甜，啱啱好。脆方好脆卜卜，正！

最後就係附送既黑森林蛋糕。果然無白費我幾飽都要食既苦心！細個食黑森林蛋糕，第一樣野就拎走面頭嗰粒超濃藥水味既cherry. 半島呢件蛋糕係唔需要咁做，因為d cherry係藏喺蛋糕既底部，而且唔係藥水味，而係剛剛taste到既酒味，真係好好食。外面好多好高質素既pastissarie, 好多好高質素，好花巧好精緻既蛋糕，突然食番一個超水準”那些年”既黑森林蛋糕，感覺似重回基本步一樣。 

Ratatouille @ home

今日原本諗住簡簡單單煎牛扒作晚餐, 番屋企途中諗緊配咩菜時候, 突然諗起又健康又易整既Ratatouille!

Ratatouille 係一道經典既法國素菜, 千其唔好俾法國菜呢個名嚇親, 非常之易整, 酸酸甜甜, 好開胃

材料︰
洋蔥 x 1(切細粒)
番茄 4 個 (去皮) / 罐裝番茄 x 1 (原粒既就切細)
茄子x1 ( 切去頭尾, 切片)
翠玉瓜x1( 切去頭尾, 切片)
紅椒、黃椒 各一 (去籽, 切粒)
蒜頭 x 3 瓣
basil 一束 (只要葉, 用手"搣"細塊)
紅酒醋(red wine vinegar) 1湯匙
糖 1茶匙

需然材料比較多, 但係準備方法都係好隨意, 材料好chunky 就可以, 唔洗好fine 咁切碎

煮法:
預熱隻pan後, 轉中火, 每次加少少油 , 分別炒以下三樣材料,( 中間唔洗洗pan 家)
1)茄子炒大約幾分鐘, 至淋身, 備用
2)翠玉瓜炒幾分鐘, 表面金黃色, 備用
3)紅、黃椒輕炒, 不需要太熟 備用.

-落少少油, 將洋蔥炒至透明, 略啡, 加蒜頭再炒多一分鐘至聞到蒜香
-將紅酒醋及糖
-將蕃茄連同一半basil倒入pan 內煮
-將之前炒過的三種材料回獲煮滾, 加鹽及胡椒調味
-上枱前將剩下的basil 放面

Moules mariniere 白酒煮青口@home

好耐無煮野食, 今日的起心奸下煮. 作為一個warm up dinner, 當然煮個又易又好食既菜式

Moules mariniere 即係白酒煮青口

city super 或一d 大少少既超級市場都會有得賣法國, 紐西蘭或澳洲既青口. 真空包裝, 入面既青口仲係活生生既. 法國比較細小, 紐西蘭或澳洲就好大隻, 好似蠔咁大隻. 

今日我喺city super 買既就係紐西蘭既青口 ($148/kg) . 因為好大隻, 所以2kg 都只有29隻 

2 個人夠食有餘, 加埋麵包點汁食就perfect. 

青口買番黎只要真空無漏氣, 都可以放喺雪櫃幾日先整都無問題

當要食既時候先拎出黎. 

準備:

1)將青口放入一盤凍水入面, 

2)用小刀仔 將表面痴住既貝殼, 石頭 等等 刮走

3)青口邊會有少少好似海草咁既野, 只要用少少力扯佢出黎就可以. 

4)再用百潔布清擦一下外面

5) 再用新一盤凍水過過水 

6)其中, 如果見到一d 青口個殼爛就揀走佢, 因為隻青口好大機會己經死左

7) 如果有開口既, 就輕力嗃下個殼, 如果活生生既青口, 就慢慢將殼緊閉. 

好似好麻煩咁, 放心. 個dinner 己經完成左8成

8) 將洋蔥切細粒, parsley 切碎

9) 預熱一個夠大既煲.. 

10) 放少少油, 將洋蔥炒至透明, 但唔要啡 

11) 先將青口放入煲內, 轉大火

12)再放大約200ml 既白酒 

13) 立即蓋上煲蓋, 計時, 大約蒸 3-4

14)中間每一分鐘要大力拎起個煲搖, 令到各青口都均勻受熱, 接觸到蒸氣

15)大約4分鐘就可以上枱. 上枱前將parsley 灑入煲內

Tips

揀煲既方法: 

A)放哂青口入去, 最好唔過個煲既一半

B)要用一個夠密實既煲, 如果漏氣就會事倍功半, 蒸極都蒸唔熟. 

白酒要用比較dry 既, 唔好太甜. 

不用加任何調味, 青口既鮮味夠哂味. 

如果煮完發現有青口唔開, 都唔等於唔食得, 只要能輕易揭開個殼都可以進食

而且壞/ 臭/ 未煮己死去的青口, 嗰陣腥臭味, 你一咬就分得出.